
第一世噶玛巴教言集1KM9རྗེ་དུས་གསུམ་མཁྱེན་པའི་ཚོགས་ཆོས་བཞུགས་སོ། །
1-2-124a
༄༅། །རྗེ་དུས་གསུམ་མཁྱེན་པའི་ཚོགས་ཆོས་བཞུགས་སོ། །
༄། །རང་གི་སེམས་ལ་གྲོས་འདེབས་ཤིང་ལྟ་བ་འདི་ཤིན་ཏུ་གལ་ཆེ།
༄༅། །རྗེ་དུས་གསུམ་མཁྱེན་པའི་ཚོགས་ཆོས་བཞུགས་སོ། །དུས་གསུམ་གྱི་སངས་རྒྱས་ཐམས་ཅད་ཀྱི་ཕྲིན་ལས་གར་གྱི་ཉམས་དགུས་འགྲོ་བ་ཐམས་ཅད་དད་པར་བྱེད་པ། འདུན་པ་དང་སྨིན་པ་དང་གྲོལ་བར་བྱེད་པ། སྐྱོན་དག་ཅིང་ཡོན་ཏན་རྫོགས་པར་བྱེད་པ། ཐབས་མཁས་ཤིང་ཐུགས་རྗེ་ཆེ་བས་སེམས་ཅན་ཐམས་ཅད་རྗེས་སུ་འཛིན་པར་མཛད་པའི་བླ་མ་རིན་པོ་ཆེ་ལ་ཕྱག་འཚལ་ལོ། །ཆོས་རྗེ་རིན་པོ་ཆེའི་ཞལ་ནས། ཐུབ་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་པའི་གསུང་རབས་ཐམས་ཅད་ཀྱང་། སེམས་འདུལ་བའི་ཐབས་སུ་གསུངས་པ་ལས་མ་གཏོགས་པ་གཞན་མེད། རང་གི་སེམས་ལ་གྲོས་འདེབས་ཤིང་ལྟ་བ་འདི་ཤིན་ཏུ་གལ་ཆེ། འོ་སྐོལ་བསྒོམ་ཆེན་ཀུན་ཀྱང་ལབ་ལོབ་ཀྱི་གཏམ་མ་བྱེད། ཆགས་སྡང་ཇེ་འཕེལ་ལ་ཕྱི་ཏ་ལ་ཐ་མལ་པ་བས་ཉོན་མོངས་ཆེར་འགྲོ་བས། ཆགས་སྡང་གིས་སྲོད་འདས་པར་བྱས་ནས༑ མདང་ཡང་ཤེས་པ་བྱིང་ནས་བསྒོམ་མ་བྱུང་བྱས་པས་ཕན་མེད། དེ་ལྟར་བྱས་ན་བསྒོམ་ཆེན་འོང་བ་དཀར་མོར་མཆི། ཆོས་བྱ་སྙམ་པ་ཏ་ཀུན་ལ་འོང་སྟེ། དེ་གཅིག་པུས་ཅུང་མི་ཕན། འཕྲལ་དགོས་ཀྱི་བྱ་བ་ཐམས་ཅད་ལིངས་ཀྱིས་བསྒྱུར་ནས། དེ་རིང་ཉིད་ནས་བསྒྲུབ་པ་བཅད་གཏད་དུ་བྱེད་དགོས། ཚེ་ལ་ལོང་མེད། འོ་སྐོལ་བསྒོམ་ཆེན་པ་ལ་ཅི་སྟེ་གཉིས་ཏེ་གཅིག་གཉེར་མེད། ཁོང་རང་མཁས་པའི་སྐྱེ་བ་ཀུན་
1-2-124b
གྱིས་བྱེད། སེམས་ལ་ཕན་ན་ཆོས་བྱ་བ་ཡིན་པས། ཁོ་བོ་བླ་མ་ཡིན་པས་སེམས་ལ་ཅི་ཕན་གྱི་ཁ་ཏ་ཟེར་བ་ཡིན། སྙིང་ཐག་པ་ནས་ཆོས་བྱ་སྙམ་ན་རྒྱུན་ཆད་མེད་པར་སེམས་ལ་ལྟ་བ་གལ་ཆེ། ཐེག་པ་ཆེན་པོ་པ་ཡིན་པས་བྱམས་སྙིང་རྗེ་ཤིན་ཏུ་གཅེས་ཏེ། ཡོན་ཏན་གྱི་ཆོས་ཐམས་ཅད་བླ་མ་ལ་བརྟེན་ནས་འབྱུང་བ་ཡིན་པས། མོས་གུས་དུས་གསུམ་རྒྱུན་ཆད་མེད་པར་དྲན་པས་བསྒྲིམས་ཏེ་མ་ཡེངས་པར་སེམས་ཡང་བླན་ཡང་བླན་བྱེད་པ་གལ་ཆེ། ཤེས་རབ་བྱ་བ་དེ་ཡང་ནང་ནས་ངེས་པ་ཅིག་འོང་། འོ་སྐོལ་བསྒོམ་པ་ཀུན་གྱིས་ཐོས་བསམ་དང་། དཔེ་བལྟ་བ་ཀུན་གྱི་དོད་མ་ཡེངས་པར་བསྒོམ་པ་ཁོ་ན་ལ་བྱ། འོ་ན་ཡང་ལས་དང་པོ་པ་ལ་དགེ་སྦྱོར་གྱི་སྒྲིགས་ཅིག་མེད་ན་ཆོས་ཉམས་སུ་ལེན་མི་ཤེས། ལུས་ངག་ཡིད་གསུམ་ཐ་མལ་དུ་འཚོར་བས་དགེ་སྦྱོར་གྱི་སྒྲིགས་སྐད་དེ་བ་གཅིག་མ་ཆག་པར་བྱེད་དགོས་པ་ཡིན། དེ་ཡང་གསུང་རབས་དང་གདམས་ངག་ཁ་ཅིག་གི་བཞེད་པས་ཐོ་རངས་ནས་བརྩི་བ་ཡང་འདུག །སྲོད་ནས་མགོ་འཛུགས་པ་ཡང་འདུག་སྟེ། འགལ་བ་ལྟ་བུ་མིན། བད་ཀན་ཤས་ཆེ་ན་ཐོ་རངས་ཤེས་པ་ཤིན་ཏུ་གསལ་བ་གཅིག་ཡོང་པས་དེ་ནས་མགོ་འཛུགས། རླུང་ཤེས་ཆེ་ན་སྲོད་ཀྱི་དུས་སུ་ཤེས་པ་རླན་ཆེ་བ་ཡིན་པས་དེ་ནས་མགོ་འཛུགས། སྲོད་ནས་ཉམས་སུ་ལེན་པའི་དབང་དུ་བྱས་ན། ཐོག་མར་འཆི་བ་མི་རྟག་པ་ནས་
1-2-125a
༄༅། །བྱམས་སྙིང་རྗེའི་བར་དུ་སྐྱེས་བུ་གསུམ་ལ་ངེས་ཤེས་བསྐྱེད། ཚོགས་བསོག་ཅིང་བར་ཆད་སེལ་བ་ཡིན་པས་རང་གིས་གང་ཤེས་ཀྱི་གཏོར་མ་བཏང་། སངས་རྒྱས་དང་བྱང་ཆུབ་སེམས་དཔའ་མདུན་གྱི་ནམ་མཁའ་ལ་གསལ་བར་བལྟས་ལ་ཡན་ལག་བདུན་པ་བྱ། མཎྜལ་དང་ཡི་གེ་བརྒྱ་པ་གལ་ཆེ་བས་བྱ། དེ་ནས་ཁྲུས་བྱ། སྣབས་ལུད་ལ་སོགས་པ་དགེ་སྦྱོར་གྱི་བར་ཆད་དུ་འགྲོ་བ་ཐམས་ཅད་བསལ་ལ་བདེ་སེང་གིས་བྱ། བྱང་ཆུབ་ཀྱི་སེམས་བསྒོམ། བསྐྱེད་པའི་རིམ་པ་ཟུང་འབྲེལ་དུ་བསྒོམ། བྱིང་རྒོད་དུ་མ་ཤོར་ཅིང་མ་ཡེངས་པར་བྱ་བ་གལ་ཆེ། དེ་ནས་བསྒོམ་གཏོང་བར་འདོད་ན་སེམས་ཅན་གྱི་དོན་དུ་བསྔོ༑ འོ་སྐོལ་འདོད་ཁམས་པ་ཡིན། མགོ་བོ་ལ་གླད་པ་འདི་ཡོད་རིང་ལ་ཅི་བྱས་ཀྱང་གཉིད་འོང་བ་ཡིན་པས་སེམས་ཅན་གྱི་དོན་དུ་ཁམས་སེང་བའི་ཆེད་དུ་གཉིད་ཐུན་ཆེ་བ་ཞིག་ལོག་ལ་ནང་པར་སྔ་བར་ལངས་སྙམ་པ་གལ་ཆེ་སྟེ། དེ་རང་ཡང་དགེ་སྦྱོར་ཡིན། དེ་ནས་ནང་པར་སྔ་བར་ལངས་ལ་འཆག་པ་ཆེ་ཆུང་ལ་སོགས་པ་བྱ། ཁྲུས་བྱ། མ་གྲུབ་ན་ཡང་ཁ་བཤལ། སྣབས་ལུད་ལ་སོགས་པ་བསལ། སེམས་ཅན་གྱི་དོན་དུ་བློ་བསྐྱེད། བསྐྱེད་རྫོགས་ཟུང་འབྲེལ་དུ་བསྒོམ། ནངས་མོ་ཚ་བའི་དུས་ལ་བབ་པ་ན་དཀོན་མཆོག་ལ་ཡན་ལག་བདུན་པ་བྱ། དེ་ནས་ཚ་བ་ཐོན་ནས་མཎྜལ་དང་། བླ་མ་ཡི་དམ་དཔའ་བོ་མཁའ་
1-2-125b
འགྲོ་ལ་གསོལ་བ་གདབ། ཡི་གེ་བརྒྱ་པ་ཅི་རིགས་སུ་བགྲང་། ཡང་བསྐྱེད་རྫོགས་ཟུང་འབྲེལ་དུ་བླ་མས་བསྟན་པ་ལྟར་མ་ཡེངས་པར་བསྒོམ། བྱིང་རྒོད་ཀྱི་དབང་དུ་མི་བཏང་། དེ་ནས་ཡང་དྲོ་དུས་སུ་ཡན་ལག་བདུན་པ་བྱ། དྲོ་ཐོན་པ་དང་ལུས་ངག་ཡིད་གསུམ་བྱིན་གྱིས་རླབས་པ་ཡིན་པས་སྐྱོ་བསང་དུ་བསྐོར་བ་བྱ། གཞན་ཡང་ཟབ་མོའི་མདོ་འདོན། གཏོར་མ་དང་ཚ་ཚ་ལ་སོགས་པ་དཀར་པོའི་ཆོས་ཅི་རིགས་པར་བྱ། དེ་ལྟར་མ་བྱས་པར་ལྟ་བ་ལ་རེ་བས་ཅུང་མི་འོང་། བྱ་འདབ་མ་གཅིག་པས་ནམ་མཁའ་མི་ཆོད། མི་རྐང་པ་གཅིག་པས་ས་མི་ཆོད། ཐབས་ཤེས་རབ་ཟུང་འབྲེལ་དུ་མ་ཡེངས་པས་རྒྱུན་ཆད་མེད་པར་བྱེད་པ་གལ་ཆེ། ཡང་དག་པར་རྫོགས་པའི་སངས་རྒྱས་ཐུགས་སྤྲོས་པ་ཐམས་ཅད་དང་བྲལ་བ། དབྱིངས་དང་ཡེ་ཤེས་དབྱེར་མེད་ཅིག་ཐོབ་པར་བྱེད་པ་ལ། རྟོག་པ་ཉེ་བར་ཞི་བར་བྱེད་དགོས། རྟོག་པ་རྩ་བ་ནས་ཞི་བར་བྱེད་པ་ལ་བསྒོམ་དགོས། སྒོམ་བྱུང་གི་ཤེས་རབ་ཀྱིས་རྟོག་པ་ཁོ་རང་སངས་རྒྱས་ཀྱི་ཐུགས་ཆོས་ཀྱི་སྐུར་ངེས་པར་བྱ། སྤང་བྱ་རྟོག་པའི་གཉེན་པོར་ཐོས་བསམ་གྱི་རྟོག་པ་གཞན་ཞིག་བཞག་པས་མི་འོངས་ཏེ། དཔེར་ན། ནད་ཚ་བའི་གཉེན་པོར། སྨན་ཚ་བ་བུར་ཆང་སྦྱར་བས་ཤི་བ་མོན་པ་ནད་ཞི་བར་མི་ནུས་པ་དང་འདྲ། ཐོས་བསམ་གྱི་ལྟ་བ་མཐར་ཐུག་པ་ཡོད་ཀྱང་། རྟོག་པ་ལ་རྟ་རྔ་འདྲེས་གང་ཙམ་
1-2-126a
༄༅། །ཡང་འཕགས་ས་མེད། སྟོང་པ་ཡིན། འདུས་བྱས་ཀྱི་དགེ་རྩ་ཅི་བྱེད་ཐམས་ཅད་བསྐུར་ནས་བསྒོམ་པ་ལ་མི་དགོས་བྱས་ནས་ལྟ་བ་མཐོན་པོ་ལ་རེ་བས་མི་ཆོག་སྟེ། དབུ་མ་ཆེན་པོ་ཀུན་ལ་མི་སྟོང་སྙམ་པའམ། ཆོས་མཐའ་དག་གི་ངོ་བོ་མི་སྟོང་སྙམ་པ་ཞིག་མེད་དེ། མ་བསྒོམས་པས་སེམས་ཁོ་རང་ཅང་ངེས་སུ་མི་བཏུབ། སློབ་དཔོན་དགེ་བའི་བཤེས་གཉེན་སྟོད་ལུང་པ་རྒྱའི་ཞལ་ནས། ལྟ་བ་མཐར་ཐུག་དེ་ང་རང་ལ་ཡོད་ཏེ། སེམས་འཛིན་པའི་ཐབས་གཅིག་དགོས་པར་འདུག་གསུངས་ནས། བལ་ཡུལ་ན་བླ་མ་དུར་ཁྲོད་པ་བྱ་བ་གྲུབ་ཐོབ་གཅིག་བཞུགས་པ་གསན་ནས། དེར་བཞུད་པའི་ལམ་དུ་བསྙུང་བའི་ལོ་རྒྱུས་ཀྱང་གསུང་ངོ་། །དེ་ན་བསྒོམ་ཆེན་པ་ཀུན་མ་བསྒོམས་པར་ཅང་མི་དགོས། རྣམ་རྟོག་གིས་ང་ལ་ཅང་མི་གནོད་བྱས་ནས་གོ་ཡུལ་གཅིག་གིས་ཅང་མི་འོང་། འཁོར་བ་བསྐྱེད་པར་བྱེད་པ་ཡང་རྣམ་རྟོག་འཕྲལ་འབྱུང་འདིས་བསྐྱེད་པར་བྱེད་པ་ཡིན། ག་ཤེད་ན་ཡོད་རྒྱུ་མེད། སངས་རྒྱས་ཀྱང་ཉོན་མོངས་པ་དང་རྣམ་རྟོག་མ་སྤངས་པའི་རྭ་བཞིན་ཟིང་ངེ་བ་ཅིག་ཅང་བཏུབ་བམ། དེས་ན་དགེ་སྦྱོར་ཅག་གེ་ཀྲིག་གེ་བ་གཅིག་བྱས་ན། ཕྱིས་གོམས་ནས་ཆག་ཐབས་མེད་པར་བསྒོམ་པོ་ཐུབ་པ་ཞིག་འོང་བ་ཡིན། ཉམས་དང་རྟོགས་པ་གཅིག་ཀྱང་གཟོད་འོང་བ་ཡིན། རྣམ་རྟོག་གིས་མི་གནོད་པ་ཞིག་ཀྱང་གཟོད་འོང་། རྣམ་
1-2-126b
རྟོག་གིས་མི་གནོད་ཟེར་བ་ཡང་རྟོག་པ་ཁོ་རང་ནམ་མཁའ་སྤྲིན་དྭངས་པའམ། མཚོ་ལ་འཁྱག་པ་ཞུ་བ་བཞིན་དུ་རྟོག་པ་ཁོ་རང་ཉེ་བར་ཞི་ནས་སྐྱེ་རྒྱུ་མེད་པ་ཞིག་དགོས། རྟོག་པ་རང་ལུགས་སུ་བྱུང་ན་གནོད་པ་དེ་ཀ་ཡིན། དེ་རྣམས་ཀྱང་ཅི་ལ་དགོས་ན། ནམ་གྱང་འོ་སྐོལ་འཆི་དགོས། ཤི་ནས་མེད་ནས་འགྲོ་ན་བཏུབ་སྟེ། སྐྱེ་དགོས། མི་དགེ་བ་བཅུ་ལ་སྤྱད་ན་ངན་སོང་དུ་སྐྱེ་སྟེ་བཟོད་པའི་ཐབས་མེད། དགེ་བ་བཅུས་མཐོ་རིས་སུ་སྐྱེས་ཀྱང་མཐོ་རིས་ན་ཡང་སྡུག་བསྔལ་ལས་བདེ་བའམ་གྲོགས་ཆེན་པོ་མེད། འཁོར་བ་སྡུག་བསྔལ་གྱི་རང་བཞིན་ཡིན། སྡུག་བསྔལ་གྱི་རང་བཞིན་སྤོང་བ་བྱེད་པ་ལ་དལ་འབྱོར་གྱི་ལུས་འདི་ལ་བརྟེན་ནས་འཁོར་བ་དང་འབྲེལ་ཐག་གཅོད་དགོས་པས་སྐྱེས་བུ་ཀུན་འབད་དགོས། ད་རེས་ཡང་དག་པའི་དགེ་བའི་བཤེས་གཉེན་དང་ནི་མཇལ། དེ་ལ་གདམས་ངག་རིན་ཆེན་ཉམས་རྟོགས་ཀྱི་རྒྱུད་པ་མ་ཆད་པ༑ ཚིག་དང་ཐ་སྙད་ཀྱིས་མ་བསླད་པ། ཚོང་དུས་ཀྱི་འོ་མར་མ་སོང་བ། མཉན་པའི་སྐལ་བ་ནི་ཡོད། ཆོས་བྱ་བློ་དུམ་རེ་ཡོད་པའི་སྐབས་འདིར་བྱ་བཞག་དང་ངོ་བསྲུང་ཆེ་ཐབས་ཐམས་ཅད་ལིངས་ཀྱིས་བཞག་ལ། དེ་རིང་ནས་འབད་དགོས་པས་དེ་བཞིན་དུ་ཐུགས་ལ་བཞག་པར་ཞུ་གསུངས། ཨྠྀི།། །།
༄། །རྟག་ཏུ་འཆི་བསམ་ལས་སུ་བསགས་པ་བསྒྲང་། དཀོན་མཆོག་གསུམ་མཆོད་ངོ་བོ་གཉིས་མེད་བསྒོམ་བྱ་བ་ཉམས་སུ་ལེན་པ་ལ་ཆོས་འདི་བཞི་གལ་ཆེ།
དགེ་བའི་བཤེས་གཉེན་རིན་པོ་ཆེ་ལ་ཕྱག་འཚལ་ལོ། །རིན་པོ་ཆེའི་ཞལ་ནས། རྟག་ཏུ་འཆི་བསམ་ལས་སུ་
1-2-127a
༄༅། །བསགས་པ་བསྒྲང་། དཀོན་མཆོག་གསུམ་མཆོད་ངོ་བོ་གཉིས་མེད་བསྒོམ་བྱ་བ་ཉམས་སུ་ལེན་པ་ལ་ཆོས་འདི་བཞི་གལ་ཆེ་གསུང་། ཆོས་ཐམས་ཅད་ཉམས་སུ་ལེན་ཙམ་ན་བཞི་པོ་འདིར་མ་འདུས་པ་མེད་དེ། དེ་ཡང་། བླ་མ་དྭགས་པོ་རིན་པོ་ཆེའི་ཞལ་ནས། འཆི་བ་བསམ་པ་འདི་དང་པོར་གལ་ཆེ་སྟེ། རང་པས་རྒན་པ་ཤི་བ། གཞོན་པ་དང་དར་ལ་བབ་པ་ཤི་བ། གྲོང་མི་དང་ཁྱིམ་མཛེས་ཤི་བ་ལ་སོགས་པ་དྲན་པར་བྱས་ལ། ཡོངས་འཆི་དགོས་པར་འདུག །འཆི་ཙམ་ན་ལོངས་ས་སྤྱོད་དང་སྙན་གྲགས་ལ་སོགས་པ་ཅིས་ཀྱང་མི་ཕན། འགྲོགས་ནས་འགྲོ་བར་མི་འདུག །ཀྱེ་མ་འཇིག་རྟེན་ཉོན་མོངས་དག །གནས་པ་མི་རྟག་མ་དགར་འགྱུར། །ཀུ་མུ་ཏའི་དཔལ་འདི་ཡང་། །དྲན་པར་བྱ་བ་ཉིད་དུ་འགྱུར། །གསུང་བ་བཞིན་དུ། ཚེ་འདི་ཐམས་ཅད་བཞག་ནས་འགྲོ་བར་གོ །འཆི་བ་ལ་ཆོས་དགོས་པར་གོ་བ་བྱུང་ན། དང་པོར་ཆོས་ལ་འཇུག་པའི་རྒྱུ་ཡིན། བར་དུ་གལ་ཆེ་སྟེ། ནམ་འཆི་ཆ་མེད་ཙ་ན། སྤྱོད་འཇུག་ལས། བདག་ཉིད་སྡིག་པ་མ་བྱང་པར། །མྱུར་དུ་གུམ་པར་འགྱུར་ཏེ་འཆི། །འདི་ལས་ཇི་ལྟར་ངེས་ཐར་ཞེས། །མྱུར་བའི་ཚུལ་གྱིས་སྐྱབས་སུ་གསོལ། །ཞེས་གསུང་བ་བཞིན་དུ། ནམ་འཆི་ཆ་མེད་ཙམ་ན། རྐང་པ་བརྐྱང་སྟེ་འདུག་མི་ཁོམ་པ་ཞིག་འོང་བས་ཆོས་ལ་འཇུག་པའི་ལྕག་ཡིན། ཐ་མར་གལ་ཆེ་སྟེ། འཆི་བ་ཤེས་
1-2-127b
རབ་ཕ་རོལ་ཕྱིན། །ཞེས་གསུང་བའམ། འཆི་བའི་མིང་ནི་དོན་དམ་བདེན་པ་སྟེ། །ཞེས་གསུང་པ་བཞིན་དུ་འཆི་བ་ཆོས་ཀྱི་སྐུ་ཡིན་ཞེས་འབྱུང་ངོ་། །འཆི་བ་བསྒོམ་པ་འདི་ཐེག་པ་ཆུང་ངུའི་ཆོས་ཡིན་སྙམ་ན། པ་ར་དང་མནྟ་གཉིས་ཀ་ལས། འཆི་བ་བསྒོམ་པ་འདི་གལ་ཆེ་བར་གསུངས། འོ་ན་ཤི་ནས་མུ་སྟེགས་རྒྱང་ཕན་པའི་གྲུབ་མཐའ་བཞིན་དུ་མེད་འགྲོའམ་ཞེ་ན། མེད་ནས་མི་འགྲོ་སྟེ། ལས་སུ་བསགས་པ་བསྒྲུང་བྱ་བ་ཡིན་པས། ལས་ཀྱི་རྗེས་སུ་འབྲངས་ནས་སྐྱེ་བ་ལེན་དགོས། དེ་ཡང་། ཞེ་སྡང་གིས་གཙོ་བྱས་པའི་མི་དགེ་བ་བཅུ་སྤྱད་ན་དམྱལ་བར་སྐྱེ་སྟེ། ཚ་བ་དང་གྲང་བ་བཙོ་བ་དང་བཤག་པ་དང་བཏུབ་པ། ཙོ་པི་དང་བསྲེག་པ་ལ་སོགས་པའི་སྡུག་བསྔལ་ལ་བཟོད་པའི་ཐབས་མེད། འོ་སྐོལ་ད་ལྟ་ལུས་ལ་མེ་སྟག་ཕོག་གམ། ཞག་གཅིག་གོས་མེད་ན་ཨ་ཚ་ཨ་ཆུ་ཟེར་ནས་མི་ཚུགས་པར་འདུག་པ་དམྱལ་བའི་སྡུག་བསྔལ་སྤོང་བ་ལ་རྒྱུ་སྤོང་དགོས་པས། ཞེ་སྡང་གིས་གཙོ་བྱས་པའི་མི་དགེ་བ་བཅུ་སྲོག་གི་ཕྱིར་ཡང་མི་བྱེད་པ་གལ་ཆེ། ཞེ་སྡང་མ་སྤངས་ན་སྐྱབས་འགྲོ་ཐུན་མོང་བའི་དབང་དུ་བྱས་ན་ཡང་། དགེ་སྦྱོང་དུ་བྱེད་པའི་ཆོས་བཞི་དང་བྲལ། བྱང་ཆུབ་སེམས་དཔའ་དབང་དུ་བྱས་ན་ཡང་། སེམས་ཅན་ཐམས་ཅད་མར་བྱས་ནས་བྱམས་པ་བསྒོམ་དགོས་ཏེ། ཞེ་སྡང་དང་བྱམས་པ་གཉིས་ལྷན་ཅིག་མི་གནས་པའི་འགལ་བ་ཡིན། བསྐལ་
1-2-128a
༄༅། །པ་སྟོང་དུ་བསགས་པའི་དགེ་བ་འཛད་པ་ལ་ཡང་ཚེགས་མེད། གསང་སྔགས་ཀྱི་དབང་དུ་བྱས་ན་ཡང་། བཅུད་ཀྱི་སེམས་ཅན་ལྷ་དང་ལྷ་མོར་བསྒོམ་དགོས། དེ་ལ་ཞེ་སྡང་བསྐྱེད་ན་ཡི་དམ་ལྷ་དང་མཇལ་ཐབས་མེད། ཞེ་སྡང་སྤངས་པ་ཞིག་ཡིན་སྲིད་ན། བྱམས་པ་ཆེན་པོའི་ཏིང་ངེ་འཛིན་ཟེར་ནས་ཀྱང་ཕུགས་བྱས་བྱས་ཙམ་ན་ཞེ་སྡང་མ་གྲུབ་པར་གོ་བ་ལ་ཟེར་བ་ཡིན་ནོ། །འདོད་ཆགས་ཀྱིས་གཙོ་བྱས་པའི་མི་དགེ་བ་བཅུ་སྤྱད་ན་ཡི་དྭགས་སུ་སྐྱེ་སྟེ། ཟས་སྐོམ་གྱི་སྒྲ་མི་ཐོས་ཏེ། ཟས་མཐོང་ཡང་ཐོ་ཐོགས་ལྔ་བརྒྱ་ཙམ་གྱིས་བསྲུང་བ་ལ་སོགས་པ་དང་། བཀྲེས་སྐོམ་གྱི་སྡུག་བསྔལ་བཟོད་པའི་ཐབས་མ་མཆིས༑ འོ་སྐོལ་ད་ལྟ་ཉིན་རེ་བཀྲེས་ཀྱང་སྔོ་རྙིད་ཀྱིས་འགྲོ་བར་འདུག་པས། དེས་ན་འདོད་ཆགས་སྤང་བ་གལ་ཆེ། ཚེ་འདིའི་དབང་དུ་བྱས་ན་ཡང་། །བརྣབ་སེམས་ཡིད་ལ་རེ་བ་འཇོམས། །གང་ཡང་འགྲུབ་པར་མི་འགྱུར་རོ། །བྱ་བ་ལོངས་སྤྱོད་ཕུན་ཚོགས་འདོད་པའི་དོན་ཐམས་ཅད་མི་འགྲུབ། ཁས་བླང་དགོས་པའི་དམ་ཚིག་དང་སྡོམ་པ་དང་ཡང་འགལ་ནས་འགྲོ། སྒོམ་ཆེན་ཀུན་གྱིས་ཀྱང་འདོད་ཆགས་ལ་སྐྱོན་དུ་མ་ལྟས་ན་འདོད་པའི་ཡོན་ཏན་གྱིས་གཡེན་སྤྱོས་ནས་ནང་དུ་སྐད་ཅིག་ཀྱང་སེམས་གནས་སུ་མི་བཏུབ། ནམ་མཁའ་མཛོད་ཀྱི་ཏིང་ངེ་འཛིན་ཡང་འདོད་པ་ཉེ་བར་ཞི་ཙམ་ན་འོང་བ་ཡིན་ནོ། །གཏི་མུག་གིས་
1-2-128b
གཙོ་བྱས་པའི་མི་དགེ་བ་བཅུ་ལ་སྤྱད་ན་དུད་འགྲོར་སྐྱེ་སྟེ། ཕྱིའི་རྒྱ་མཚོ་ན་ཚང་གར་གྱི་སྦང་མ་ཙམ་པ་ཡོད་པ་ལ་ཆེ་ཆེའི་ཁ་གདངས་པས་ཆུང་ཆུང་ཟ་བ་ལ་སོགས་པ་དུཿཁ་དཔག་ཏུ་མེད་ལ། བདེ་བ་སྐད་ཅིག་ཙམ་ཡང་མེད། རྟ་ཕྱུགས་ལ་སོགས་པ་འདི་ཀུན་དུད་འགྲོ་མཐོ་རིས་པ་བྱ་བ་ཡིན་ཏེ། སྐྱིད་ཤོས་ཡིན་པར་འདུག་སྟེ་ཡང་། དུས་རྟག་ཏུ་ཤ་བཙོན་གདོས་སུ་ཚུད་པ་ཙམ་གྱི་དུ་ཁ་ཡོད་པ་ཡིན་པར་འདུག །དེས་ན་གཏི་མུག་གིས་གཙོ་བྱས་པའི་མི་དགེ་བ་བཅུ་སྤོང་བ་གལ་ཆེ་སྟེ། གཏི་མུག་མ་སྤངས་པ་ཅིག་ཡིན་སྲིད་ན། བདག་ཡོད་ནས་ནི་གཞན་དུ་ཤེས་བདག་གཞན་ཆ་ལས་འཛིན་དང་སྡང་། འདི་གཉིས་དང་ནི་འབྲེལ་བ་ལས། །ཉེས་པ་ཐམས་ཅད་འབྱུང་བ་ཡིན། །ཞེས་གསུང་བ་བཞིན་དུ་ཉེས་པ་ཐམས་ཅད་ཀྱི་རྩ་བ་གཏི་མུག་ཡིན་པས་དེ་སྤང་བ་གལ་ཆེ། དེ་སྤོང་བར་བྱེད་པ་ཡང་། ཐོས་བསམ་བསྒོམ་གསུམ་གྱི་ཤེས་རབ་ཡིན༑ དེ་ཡང་། ཉན་ན་ཡང་ཐེག་པ་ཆེན་པོའི་ཆོས་ཉན། བསམ་པ་ཡང་ཐེག་པ་ཆེན་པོའི་ཆོས་བསམ། བསྒོམ་ན་ཡང་ཐེག་པ་ཆེན་པོའི་ཆོས་བསྒོམ་དགོས་ཏེ། ཐེག་པ་ཆུང་ངུ་ལ་ཐོས་བསམ་ལ་སོགས་པ་བྱས་ཀྱང་གྲུར་འཇུག་པ་དང་འདྲ། གཏི་མུག་སྤངས་པ་ཞིག་ཡིན་སྲིད་ན། འོད་གསལ་ཆེན་པོའི་ཏིང་ངེ་འཛིན་ཟེར་ནས་ཀྱང་གཏི་མུག་ཉེ་བར་ཞི་བ་ལ་ཟེར་བ་ཡིན། དེས་ན་དུག་གསུམ་གྱིས་ཀུན་ནས་བསླང་བའི་མི་
1-2-129a
༄༅། །དགེ་བ་བཅུ་སྤོང་བ་འདི་གལ་ཆེ་གསུང་། ལས་དགེ་བ་བཅུ་ལ་བརྟེན་ནས་མཐོ་རིས་ལྷ་དང་མིར་སྐྱེས་ཀྱང་འཁོར་བ་སྡུག་བསྔལ་གྱི་རང་བཞིན་ལས་སྐྱིད་གྲོགས་ཆེན་པོ་མེད། བརྒྱ་བྱིན་ཆེན་པོ་ཉིད་དུ་སྐྱེས་གྱུར་ཀྱང་། །ལས་ཀྱི་དབང་གིས་ཡང་བྲན་ཉིད་དུ་འགྱུར། །ཞེས་སོ། །འོ་ན་འཁོར་བ་སྡུག་བསྔལ་གྱི་རང་བཞིན་འདི་སྤོང་ཞིང་མྱ་ངན་ལས་འདས་པ་འདི་རྒྱུད་ལ་སྐྱེ་བར་བྱེད་པ་ལ་གང་དགོས་སྙམ་ན༑ དཀོན་མཆོག་གསུམ་མཆོད་ཅེས་པ་ཚོགས་བསག་དགོས། བསོད་ནམས་འདོད་པས་དེ་བཞིན་གཤེགས་པ་ལ་མཆོད་པ་བྱའོ་ཞེས་པ་བཞིན་དུ། ཡུལ་དཀོན་མཆོག་གསུམ་ལ་མཆོད་པ་བྱེད་དགོས། དེ་ཡང་རབ་བསྒྲུབ་པའི་མཆོད་པ་ཡིན་ཏེ། ཕ་རོལ་དུ་ཕྱིན་པའི་དབང་དུ་བྱས་ན། ཕ་རོལ་ཏུ་ཕྱིན་པ་དྲུག་བསྡུ་བའི་དངོས་པོ་བཞི་ལ་སྤྱོད་པ་ཡིན། གསང་སྔགས་ཀྱི་དབང་དུ་བྱས་ན། བསྐྱེད་རྫོགས་ཐུན་བཞི་ལ་སོགས་པར་བསྒོམ་པ་ཡིན། འབྲིང་ལུས་ཀྱི་མཆོད་པ། བླ་མ་དང་དཀོན་མཆོག་ལ་ལུས་ཀྱི་མཆོད་པ་ལམ་འཕྲང་འཕྱག་པ་ལ་སོགས་ལ་ཟེར། ཐ་མ་རྫས་རིམ་པར་བཤམས་པའི་མཆོད་པ་ཡིན་ཏེ། དེ་ལྟར་དཀོན་མཆོག་མཆོད་པ་ལ་བརྟེན་ནས། གང་གིས་སྨོན་ལམ་ཅི་བཏབ་པ། །དེ་ནི་དེ་ལྟ་ཉིད་དུ་འགྱུར། །གསུང་བ་བཞིན་དུ་སྨོན་ལམ་བཏབ་པ་ཐམས་ཅད་ཀྱང་འགྲུབ། གསང་སྔགས་ཀྱི་རླུང་སེམས་སྦྱངས་ནས་
1-2-129b
འཕོ་བ་དང་ཁྱད་མེད། དཀོན་མཆོག་ལ་བསོད་ནམས་བསགས་པ་ལ་བརྟེན་ནས་བྱང་སེམས་ཀྱང་གཟོད་སྐྱེ། འོ་ན་མྱ་ངན་ལས་འདས་པ་ཐོབ་པར་བྱེད་པ་ལ་བསོད་ནམས་ཀྱི་ཚོགས་རྐྱང་པས་ཆོག་གམ་སྙམ་ན་ངོ་བོ་གཉིས་མེད་བསྒོམ་བྱ་བ་ཡེ་ཤེས་ཀྱི་ཚོགས་སྟོང་པ་ཉིད་དུ་བསྒོམ་དགོས་ཏེ། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་པའམ། སྟོང་ཉིད་རྟོགས་པས་གྲོལ་འགྱུར་གྱི༑ ༑བསྒོམ་པ་ལྷག་མ་དེ་དོན་ཡིན། །གསུང་པ་བཞིན་དུ། དཀོན་མཆོག་མཆོད་པ་ལ་སོགས་པ་དེ་རྣམས་ཀྱང་སྟོང་པ་ཉིད་དུ་ངེས་པར་བྱེད་པའི་ཐབས་དྲང་བའི་དོན་ཡིན། སྟོང་པ་ཉིད་དེ་ཡང་ཅི་ཐོ་ཐོད་སྟོང་པས་མི་ཕན། བྱང་ཀའི་ཕ་འོང་སྟོང་འདོད་མི་སྟོང་འདོད། ནམ་མཁའ་སྟོང་པ་རྟག་ཏུ་སྟོང་ཡང་ཕན་མ་བཏགས། དེ་ཡང་རང་གི་སེམས་སྟོང་པ་ཉིད་དུ་ངེས་དགོས་ཏེ། །དེ་ཐོབ་སྡུག་བསྔལ་གཞོམ་འདོད་ཀྱང་། དེ་དག་དོན་མེད་ཀྱི་ནར་འཁྱམས། །ཞེས་སོ། །སེམས་རྟོགས་དགོས་པར་ཡང་། སེམས་རྟོགས་ན་ཡེ་ཤེས་ཡིན་པས་སངས་རྒྱས་གཞན་ནས་མི་བཙལ། ཞེས་གསུང་། དེ་སྟོང་པ་ཉིད་ཡིན་པར་ཡང་། རང་སེམས་གཟོད་ནས་མ་སྐྱེས་པ། །སྟོང་པ་ཉིད་ཀྱི་མཚན་ཉིད་སྟེ། །ཞེས་བྱ་བ་གསུངས། འོ་ན་སེམས་རྟོགས་པར་བྱེད་པའི་གདམས་ངག་གང་ཡིན་སྙམ་ན། འདི་ལ་བསལ་བ་ཅི་ཡང་མེད། །བཞག་པར་བྱ་བ་ཅུང་
1-2-130a
༄༅། །ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་པའམ། །གང་ཚེ་དངོས་དང་དངོས་མེད་དག །བློ་འི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས༑ ༑དམིགས་པ་མེད་པས་རབ་ཏུ་ཞི། །ཞེས་བྱ་བ་ལ་སོགས་པ་བསྒོམ་པའི་གདམས་ངག་སྟེ། ཤེས་པ་སོ་མ་མ་བཅོས་པ་དམིགས་པ་ཐམས་ཅད་དང་བྲལ་བ་ཁོ་རང་གི་ངང་ལ་འཇོག་པ་ལ་ཟེར། དེ་ཙམ་ན་ཞི་གནས་ལྷག་མཐོང་ཟུང་དུ་འབྲེལ་བ་ཞིག་ཀྱང་གཟོད་འོང་། དེ་ལྟར་མ་ཡིན་ཏེ་ལྟ་བ་སོ་སོར་རྟོག་པའི་ཤེས་རབ་རྟོག་པ་ཕར་བཙལ་བའི་སྟོང་པ་གོ་ཡུལ་དུ་བཞག །བསྒོམ་པ་ཞི་གནས་ལྡེངས་པོ་ཉམས་ཞིག་ལ་བྱས་པས་ཉམས་རྟོགས་ཞི་གནས་ལྷག་མཐོང་ཟུང་དུ་འབྲེལ་བ་ཅུང་མི་བཏུབ། དེ་བས་ན་རིག་པ་ཁོ་རང་གི་ངང་ལ་བཞག་པས་རིག་པ་ཁོ་རང་ནང་ནས་ངེས། བློ་གྲོས་ཕར་བཙལ་མི་དགོས་ཙམ་ན་རྩ་བྲལ་དུ་གོ་བས་གོལ་ས་གསུམ་གྱི་དོགས་མེད། བློ་གྲོས་ཕར་མ་བཞག་པའམ། དམིགས་ཡུལ་དུ་མ་ཤོར་བས་ཤོར་ས་བཞིའི་དོགས་མ་མཆིས། དེ་ཙམ་ན་ལྟ་བ་ཁས་ལེན་ཐམས་ཅད་དང་བྲལ་བ། སེམས་རྟོགས་པས་བསྒོམ་པ་ངོས་བཟུང་ཐམས་ཅད་དང་བྲལ་བ། དམིགས་བྱ་དམིགས་བྱེད་ལས་འདས་པ། སྤྱོད་པ་བླང་དོར་ཐམས་ཅད་དང་བྲལ་བ་སྟེ། ལྟ་བ་བསྒོམ་པ་སྤྱོད་པ་གསུམ་རོ་གཅིག་དུ་གྱུར། དུག་གསུམ་རྩ་
1-2-130b
བྲལ་དུ་སོང་བས་བྱམས་པ་ཆེན་པོའི་ཏིང་ངེ་འཛིན་ལ་སོགས་པ་ཏིང་ངེ་འཛིན་མཐར་ཐུག་པ་ལ་མཉམ་པར་འཇོག །ལར་བླ་མ་རིན་ཆེན་གྱི་བཞེད་པ་ཡིས། །ཐབས་རིག་པ་ངང་ལ་བཞག་གྱུར་པས། །ཤེས་རབ་རིག་པ་ནང་ནས་ངེས། །ཐམས་ཅད་རིག་པའི་ངང་དུ་གྲོལ། །ལྟ་ཤེས་ཀུན་ལ་མཁས་པར་འགྱུར། །དེ་བས་ན། ངོ་བོ་གཉིས་མེད་བསྒོམ་ཞེས་པས་སེམས་བསྒོམ་པ་གལ་ཆེ། དེ་རྣམས་ལ་ཡང་གང་དགོས་ན༑ ༑ཡོན་ཏན་ཐམས་ཅད་རབ་རྫོགས་ཀྱང་། །བླ་མ་མེད་ན་སྲིད་ཐར་མིན། །ཞེས་པའམ། ཇི་སྲིད་དུ་རྫོགས་པའི་སངས་རྒྱས་མ་ཐོབ་པ་དེ་སྲིད་དུ་དགེ་བའི་བཤེས་གཉེན་མཉེས་པར་བྱའོ་ཞེས་པའམ། སངས་རྒྱས་ཆོས་རྣམས་དགེ་བའི་བཤེས་ལ་བརྟེན་ཏོ་ཞེས། །ཡོན་ཏན་མཆོག་མངའ་རྒྱལ་བས་དེ་སྐད་གསུངས། ཞེས་པས་བླ་མ་གལ་ཆེ། བླ་མ་དེ་ཡང་སུས་ཐོད་ཐོད་ལ་བརྟེན་པས་མི་ཕན་ཏེ། དུས་གསུམ་གྱི་སངས་རྒྱས་ཐམས་ཅད་ཀྱི་ཕྲིན་ལས་ལ་ཞུགས་པ། སྐུ་མཐོང་བ་ཙམ་གྱིས་བྱིན་རླབས་འབྱུང་བ་ལ་སོགས་པ། དེ་ཡང་། དང་པོ་སེམས་མི་གནས་པ་གནས་པར་བྱེད་པའི་ཐབས་ལ་མཁས་པ། གནས་པའི་ཏིང་ངེ་འཛིན་ནི་ངོ་ཤེས་པར་བྱེད་པའི་ཐབས་ལ་མཁས་པའི་བླ་མ་ཉམས་རྟོགས་ཅན་ཞིག་བསྟེན་དགོས། འོ་ན་བསྟེན་ལུགས་ཇི་ལྟར་བྱ་ན། མ་གུས་པ་སྤངས་ལ་ལུས་ངག་ཡིད་གསུམ་གུས་པས་བསྟེན། དེ་ཡང་། 
1-2-131a
༄༅། །ལུས་གུས་པ་བླ་མའི་སྤྱན་སྔར་རྐང་པ་བརྐྱང་སྟེ་འདུག་པ་དང་། བླ་མ་བྱོན་པ་ལ་ཕྱག་མི་བྱེད་པ་དང་། ལྡང་བ་མི་བྱེད་པ་ལ་སོགས་པ་སྤང་། །དམའ་བའི་སྟན་ལ་རབ་ཏུ་འདུག །དུལ་བའི་དཔལ་ནི་རྣམ་པར་བསྐྱེད། །དགའ་དང་བཅས་པའི་མིག་གིས་བལྟ། །ས་གཞི་སྟན་ནི་ཇི་ལྟ་བར། །བླ་མ་བསྒྲུབ་པའི་བྱ་བ་ལ། །སྐྱོ་ངས་སེམས་ནི་རབ་སྤངས་ཏེ། །དད་དང་ཆུ་བོའི་རྒྱུན་བཞིན་དུ། །ཞེས་གསུངས་པས་གུས་པ་པ་ཆེན་པོའི་སྒོ་ནས་བསྟེན། ངག་གུས་པ་སྟེ། བླ་མའི་སྤྱན་སྔར་ཚོགས་པའི་གཏམ་དང་འཁྲུག་པའི་གཏམ་དང་འཁྲིག་ཚིག་ལ་སོགས་པ་དུག་གསུམ་གྱིས་ཀུན་ནས་བསླང་བའི་སྨྲ་བ་མ་དག་པ་ཐམས་ཅད་སྤང་༑ ཆོས་འདྲི་བ་ལ་སོགས་པ་ངག་གི་ལས་སྨྲ་བར་འོས་པ་གུས་པའི་སྒོ་ནས་སྨྲ། ཡིད་མ་གུས་པ་ནི་བླ་མའི་སྐྱོན་ལ་སོགས་པ་སྟེ། སློབ་མའི་མེ་ལོང་བླ་མ་ཡིན་པས། རང་གི་རྒྱུད་ལ་གང་ཡོད་པ་དེ་བླ་མ་ལ་ཡོད་པར་སྣང་བ་འབྱུང་སྟེ། བླ་མ་རང་ཡང་ཞེ་སྡང་ཆེ་བར་འདུག་བྱ་བའམ། སེར་སྣ་ཆེ། ཁ་མཆུ་མང་། ནོར་ལ་སྲེད་བྱ་བའམ། ཆོས་མི་སྟོན་བྱ་བའམ། འབ་ཀྱིས་དྲིལ་ན་བླ་མའི་ཡོན་ཏན་ལ་མི་རྟོག་པར་བླ་མའི་སྐྱོན་ལ་རྟོག་ན་མི་གུས་པ་སྟེ། དེ་ལྟར་བྱས་ན་འཁོར་བ་ནས་ཐོན་པའི་ཐབས་མེད། དེ་སྐད་དུ་ཡང་། དངོས་གྲུབ་སློབ་དཔོན་རྗེས་འབྲང་གསུང་། །ཞེས་པས་བླ་མ་ལ་མ་གུས་པ་སྤང་བ་གལ་ཆེ། དེས་ན་བླ་
1-2-131b
མ་ལ་གུས་པར་བྱ། མཛད་པ་ཐམས་ཅད་སངས་རྒྱས་ཀྱི་མཛད་པར་བལྟ། དེ་ལྟར་ལྟས་པས་ནད་དང་གནོད་པ་ཐམས་ཅད་ཞི། ཡོན་ཏན་ཐམས་ཅད་བུམ་པ་གང་བྱོའི་ཚུལ་དུ་རྒྱུད་ལ་འཆར། དེ་ཡང་གང་ལ་དགོས་ན། མལ་གྱི་ཐ་མ་ན་ཉལ་བ་ལ་སོགས་པའི་དུས་སུ་དགོས་པ་ཡིན་གསུངས། དེ་ལྟར་ཐུགས་ལ་བཞག་པར་ཞུ། །ཨྠྀི།། །།
༄། །གསང་སྔགས་ཀྱི་བསྒོམ་བསྒྲུབ།
བླ་མ་རིན་པོ་ཆེ་ལ་ཕྱག་འཚལ་ལོ། །རིན་པོ་ཆེའི་ཞལ་ནས། གསང་སྔགས་ཀྱི་བསྒོམ་བསྒྲུབ་གཤའ་མ་ཞིག་བྱེད་ན། ཆགས་པ་དང་། ཡོན་ཏན་གྱིས་རློམ་པ་གཉིས་བདུད་ཆེ་བར་འདུག་གསུང་། སློབ་དཔོན་ཀླུ་སྒྲུབ་ཀྱིས་ས་དང་པོའི་བདེན་པ་མཐོང་ནས། གནོད་སྦྱིན་མོ་བསྒྲུབས་པས་མ་འགྲུབ་པ་ལ། སློབ་དཔོན་ལ་རྫའི་བུམ་པ་བྱ་རོག་གི་མིག་ལྟ་བུ་གཅིག་ཡོད་པས། སློབ་དཔོན་ཀླུའི་བྱང་ཆུབ་ཀྱིས་དེ་ལ་ཆགས་པར་གཟིགས་ནས་བཅག་པས། དེར་གནོད་སྦྱིན་མོ་གྲུབ་ནས་བསྒྲུབ་ཁང་གི་མདུན་ན་ཕར་ཟེགས་མའི་ཕུང་པོ་ཡོད་པ་ཐམས་ཅད་རིན་པོ་ཆེ་དང་བཟའ་བའི་རྣམ་པར་སོང་ནས་གནོད་སྦྱིན་མོས་རང་གཟུགས་བསྟན་པས། དེར་སློབ་དཔོན་གྱིས་འཁངས་པས། གནོད་སྦྱིན་མོའི་ཞལ་ནས། ངས་དང་པོ་ནས་འོངས་ཏེ་སློབ་དཔོན་རྫའི་བུམ་པ་ལ་ཆགས་པས་ལན་གསུང་ངོ་། །ཡང་སློབ་དཔོན་ལ་ཐུགས་རྒྱལ་རྣམ་པ་བཞིས་ནོན་ནས་ཡོད་པར་འདུག །ཁྲིམས་ང་ལས་རྒན་པ་མེད་དེ་ལོ་ལྔ་བརྒྱ་ལོན། 
1-2-132a
༄༅། །མཁྱེན་པ་ང་ལས་ཆེ་བ་མེད་དེ་གསུང་རབས་གཅིག་ཀྱང་མ་ལུས་པ་ཤེས། ནུས་པ་ང་ལས་ཆེ་བ་མེད་དེ་འདོད་འཇོའི་བ་དང་གསེར་འགྱུར་གྱི་རྩི་ལ་སོགས་པ་ངས་ཤེས། སྙིང་རྗེ་ང་ལས་ཆེ་བ་མེད་དེ་སེམས་ཅན་གྱི་དོན་སྣ་ཚོགས་པ་ངས་བྱེད་སྙམ་པ་དང་། སློབ་དཔོན་གྱིས་རྒྱ་གར་གྱི་གྲོང་གཅིག་ན་ཕར་བྱོན་པས། དགེ་སློང་གཅིག་དང་ཕྲད། ཁྱེད་ཀྱིས་ཁྲིམས་ཇི་ཙམ་ལོན་བྱས་པས། སངས་རྒྱས་འོད་སྲུངས་ཀྱི་བསྟན་པ་ལ་ཁྲིམས་བླངས་གསུངས་པས་ཐུགས་རྒྱལ་གཅིག་ཆག་གོ །དེ་ནས་ཀླུའི་ཡུལ་དུ་བྱོན་ནས་ཡོད་ཙམ་ན། མཁའ་འགྲོ་མ་གཅིག་གིས་བསྟན་པས་གསུང་རབས་གྲངས་ཀྱང་མ་ཤེས་ནས་ཐུགས་རྒྱལ་གཅིག་ཆག་གོ །དེ་ནས་ཕར་ལ་ཕྱིན་པས་རྡོ་རྗེའི་འདམ་པ་ལ་སློབ་དཔོན་གྱི་ཞབས་འབྱར། དེར་ཇོ་མོ་སྒྲོལ་མ་ལ་གསོལ་བ་བཏབ་པས་ཞབས་ཐོན་པས་ཐུགས་རྒྱལ་གཅིག་ཆག་གོ །དེ་ནས་ཕར་བྱོན་ཚེ་ཁྱི་རོ་བམ་པོ་གཅིག་མནམ་ཀུས་ཉེ་མ་ནུས་པ་ལ། སྤྲང་པོ་རྒད་པོ་གཅིག་གིས་ཁྱི་ཡི་འབུ་བསལ་ནས་ཁོ་རང་གི་ཤ་ཚལ་པར་བཏགས་ནས་འབུ་ལ་བྱིན་པས། སྤྲང་པོ་རྒད་པོའི་སྙིང་རྗེ་ཙམ་ཡང་ང་ལ་མེད་པ་སྙམ་ནས་ཐུགས་རྒྱལ་ཆག་པས། གདོད་ཡོན་ཏན་རིན་པོ་ཆེ་སྣ་ཚོགས་ཐུགས་ལ་འཁྲུངས་སོ། །སློབ་དཔོན་བྱང་ཆུབ་སེམས་དཔའ་ཟླ་བའི་རྒྱལ་མཚན་བྱ་བ་ལ་ཏིང་ངེ་འཛིན་བཟང་པོ་དབུ་ལ་བྱ་བབས་
1-2-132b
པ་མི་ཚོར་བ་མངའ་ནས་ཐུགས་རྒྱལ་གྱིས་ནོན་ནས་ཡོད་པ་ལ། ནུབ་གཅིག་རྨི་ལམ་དུ་མི་སྐྱ་སང་ངེ་བ་གཅིག་བྱུང་ནས། དེ་ལྟ་བུ་ལ་ང་རྒྱལ་བ་འོ་རེ་རྒྱལ། ཁྱོད་བསྒོམ་གཤའ་མར་བྱེད་ན། སློབ་དཔོན་བརྒྱ་རྩ་བརྒྱད་ལ་བསྒོམ་གཏུགས། སློབ་མ་བརྒྱ་རྩ་བརྒྱད་ལ་སེམས་འཛིན་སློབས། ལྷ་ཁང་བརྒྱ་རྩ་བརྒྱད་ཞིག་རལ་གསོས། མཆོད་རྟེན་བརྒྱ་རྩ་བརྒྱད་བཞེངས། དགེ་སློང་བརྒྱ་རྩ་བརྒྱད་ལ་ཆོས་སྟོན་དྲོངས། བཙོན་ལམ་བརྒྱ་རྩ་བརྒྱད་ཆོས་གསུང་ངོ་། །དེར་སློབ་དཔོན་སྙམ་པ་ལ། ང་རང་གི་ལྟོ་གོས་ཀྱང་མི་ཆད་པར། ལྷ་ཁང་གསོ་བ་ལ་སོགས་པ་ག་ན་ཡོང་སྙམ་པ་ལ། ནུབ་གཅིག་རྨི་ལམ་དུ་བྱུང་ནས་འཇིགས་མི་དགོས། ངའི་ཁ་སར་པ་ཎིའི་ལྷ་ཁང་གསོས། དེར་སྦྱངས་པས། ཁྱེད་ལྷ་ཁང་སྦྱོང་ན་ངེད་ཀྱང་ཟས་ནོར་འབུལ་ཟེར་ནས་སྐུ་བསོད་སྐྱེས་པས་ཟས་ནོར་ཟད་པ་མེད་པ་བྱུང་ནས། ཕྱིས་ལྷག་རབ་བྱུང་སྟོང་ཚོ་ཙམ་ལ་འཚོ་བ་སྦྱོར། བཙོན་གཅིག་པུ་ལ་དེ་སྔ་བདུན་བཅུ་རྩ་ལྔ་ལས་མ་ཐལ་གསུང་། ལར་ལྷ་དང་རྨི་ལམ་བཟང་པོ་ལ་རེ་མ་ཆེ། བར་ཆད་དུ་འགྲོ་ཉེན་ཡོད། མཐོང་སྣང་དུ་འགྲོ་ཉེན་ཡོད། རེ་དོགས་མེད་པའི་རྒྱས་ཐེབས་ན་གཟོད་འགྲུབ་འོང་བ་ཡིན། ཡོན་ཏན་ཨེན་རེ་ལ་རློམ་ན་ལམ་གྱི་གེགས་སུ་འགྲོ་གསུང་། ཡོན་ཏན་མ་བྱུང་ན་བསོད་ནམས་ལ་འཁང་དུ་མི་རུང་། བླ་མ་བཟང་པོ་དང་ཕྲད་ནས་གདམས་ངག་བཟང་པོ་ལོན་
1-2-133a
༄༅། །ཅིང་བསྒྲུབ་པ་བྱར་ཡོད་ན་བསོད་ནམས་ཆེ་བ་ཡིན། ནོར་རྫས་ཆེ་བས་བསོད་ནམས་ཆེ་བ་མིན། ཀླུའི་རྒྱལ་པོ་ལ་ནོར་བུ་རིན་པོ་ཆེ་ཡོད་སྟེ་ཅི་ཕན་བྱོལ་སོང་ཡིན། ཐུར་དུ་འགྲོ། གཞན་ཀུན་དེ་དང་འདྲ། དུས་དེང་སང་ཆོས་བྱེད་པའི་སྐལ་བ་དང་ལྡན་པ་ཨུ་དུམ་ཝཱ་རའི་མེ་ཏོག་པས་ཀྱང་དཀོན་པ་ཡིན། བྱོལ་སོང་ཀུན་གྱི་ཤེས་པ་ལ་བཀྲ་ལམ་མེ་ཡོད་ཀྱང་ལས་ཀྱི་དབང་གིས་ཐབས་རྡུགས་པ་ཡིན། སྐྱེས་བུ་རྣམས་ཉམས་ལེན་བཟང་ངན་འཆི་ཁར་འོང་། དེ་བར་དོར་འོང་། དེ་སྐྱེ་བ་ཕྱི་མ་ལ་འོང་བ་ཡིན། ད་ལྟ་ཉམས་ལེན་ངན་ན་གདམས་ངག་མང་པོ་ཡོད་ཀྱང་ཕན་མེད། སྨན་དཔྱད་གླགས་པ་དང་འདྲ། འཆི་བ་ནམ་འོང་ཆ་མེད། གཞོན་པས་མི་འཆི་སྙམ་སྟེ་འཆི་བ་ལ་ཟད་པ་མེད། འཁྲུག་པ་བྱུང་ན་དར་ལ་བབ་པ་ཉི་ཚེ་འཆི། རྒས་པས་མི་འཆི་སྙམ་ན་ལུས་པ་མེད། འཆི་བ་ཚེ་སྲོག་ཟད་ཙམ་ན། སངས་རྒྱས་བྱོན་ཡང་ཕན་མེད་པས་ད་ལྟ་འབད་པར་ཞུ། ལས་འཁྲུལ་པར་མ་ཤེས་ན་ལྡོག་ཏུ་མི་བཏུབ། རྟོག་བཅས་འཁྲུལ་པ་དང་། རྟོག་མེད་འཁྲུལ་པ་ཡིན། རྟོག་བཅས་འཁྲུལ་པ་དེ་ཐོས་བསམ་གྱིས་སྤོང་། རྟོག་མེད་འཁྲུལ་པ་དེས་སྤོང་མི་ནུས། རང་བཞིན་མེད་པ་ཙམ་དུ་གོ་ཡང་། དེས་འཁྲུལ་པ་ལྡོག་ཏུ་མི་བཏུབ། མིག་བཙིར་བའི་དུས་སུ་སྣང་བ་དང་རི་བོ་གཉིས་སུ་མེད་པར་སྣང་བ་རང་བཞིན་མེད་པར་གོ་ཡང་བཙིར་བ་མ་བཏང་
1-2-133b
གི་བར་དུ་གཉིས་སྣང་ལྡོག་ཏུ་མི་བཏུབ། ཡང་མིག་ནད་ཅན་ལ་སྐྲ་ཤད་ལྡོག་ཏུ་མི་བཏུབ། སྨན་པ་མཁས་པས་སྨན་སྦྱར་བས་སྐྲ་ཤད་ལྡོག་པ་དང་འདྲ་བས་བསྒོམ་དགོས་པ་ཡིན། དེས་ན་བསྒོམ་པ་ཤིན་ཏུ་གནད་ཆེ་གསུང་། མལ་གྱི་ཐ་མ་ན་ཉལ། ཟས་ཀྱི་ཐ་མ་ཟ་ཙམ་ན། ཆོས་བསྒོམས་པ་མིན་པ་གཞན་གྱིས་མི་ཕན་པས་བྱ་བ་ཐམས་ཅད་བོར་ལ་བསྒོམ་པར་ཞུ་གསུང་། ཨྠྀི།། །།
༄། །རྟེན་གྱི་གང་ཟག་གཅིག་བླ་ན་མེད་པའི་བྱང་ཆུབ་ཐོབ་པར་བྱེད་པ་ལ་ཆོས་འདི་བཞི་གལ་ཆེ།
ན་མོ་གུ་རུ། རིན་པོ་ཆེའི་ཞལ་ནས༑ རྟེན་གྱི་གང་ཟག་གཅིག་བླ་ན་མེད་པའི་བྱང་ཆུབ་ཐོབ་པར་བྱེད་པ་ལ་ཆོས་འདི་བཞི་གལ་ཆེ་གསུང་། ཚུལ་གནས་ཐོས་དང་བསམ་གཏན་དང་། །བསྒོམ་པ་ལ་ནི་རབ་ཏུ་སྦྱོར། །ཅེས་གསུངས་པ་ནི། དང་པོར་ཚུལ་ཁྲིམས་གལ་ཆེ་སྟེ། དེ་ཕྱིར་སྟོན་པས་ཚུལ་ཁྲིམས་རབ་བསྔགས་བཤད། །ཚུལ་ཁྲིམས་ལྡན་པས་སངས་རྒྱས་འབྱུང་དང་འཕྲད། །ཅེས་པ་དང་། ཁྲིམས་ནི་རྒྱུ་དང་མི་རྒྱུ་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་གསུངས་པས། ཚུལ་ཁྲིམས་རྣམ་པར་དག་པ་གཅིག་བསྲུངས་པས་སེམས་ལ་འགྱོད་པ་མེད་པས་ཏིང་ངེ་འཛིན་ཁྱད་པར་ཅན་སྐྱེ་བའི་རྒྱུ་ཡིན་ནོ། །ཐོས་པ་གལ་ཆེ་སྟེ། ཐོས་པ་མ་རིག་མུན་སེལ་སྒྲོན་མའི་མཆོག །འཕོངས་པའི་དུས་སུ་མི་སྤོང་མཛའ་བོ་ཡིན། །རྐུན་པོ་ལ་སོགས་མི་འཕྲོག་ནོར་གྱི་མཆོག །ཡ་རབས་གོང་མ་རྣམས་དང་ཕྲད་ན་གྲོགས་ཀྱི་མཆོག །ཅེས་གསུངས་
1-2-134a
༄༅། །སོ། །ཡང་། ཐོས་པས་སྡིག་ལས་ལྡོག་པར་བྱེད། །ཐོས་པས་དོན་མ་ཡིན་པ་སྤོང་། །ཐོས་པས་ཆོས་ཀྱི་བྱེ་བྲག་ཤེས། །ཐོས་པས་མྱ་ངན་འདས་པ་འཐོབ། །ཞེས་པ་ལ་སོགས་པ་གསུངས་པས་ཐོས་པ་གལ་ཆེ། །མང་དུ་ཐོས་པ་ནགས་ཀྱི་ནང་འདབས་སུ། །ལང་ཚོ་ཡོལ་བ་དག་ཏུ་གནས་པ་བདེ། །སངས་རྒྱས་ཆོས་ནི་ཚོལ་འདོད་ན། །ཐོས་པ་མང་པོའི་མི་ཕྱིར་འབྲོངས། །དགེ་བ་མཁན་པོ་བཞིན་དུ་བཀུར༑ ༑སངས་རྒྱས་མྱུར་དུ་འགྲུབ་པར་འགྱུར། །ཞེས་གསུངས་སོ། །དེའི་སྟེང་དུ་ཡང་། བསམ་པའི་ཤེས་རབ་གལ་ཆེ་སྟེ། མ་བསམས་ན་སྣོད་ཞབས་རྡོལ་དང་འདྲ། ཐོས་པ་ཆུད་འཛའ་བས། བློ་རྡོལ་བུམ་བྱུ པའི་ཆུ་བཞིན་དུ། །དྲན་པ་ལ་ནི་དེ་མི་གནས། །ཞེས་གསུངས་པས་བསམ་དགོས། བསམས་པས་ཉོན་མོངས་པ་མགོ་ནོན་པའོ། །དེ་ཡང་མ་བསྒོམས་ན་ཕན་མེད་དེ། སངས་རྒྱས་ཕལ་པོ་ཆེ་ལས་ཀྱང་། །དཔེར་ན་མཚོ་ཆེན་མཉམ་པ་བཞིན། །སྐྱེ་བོ་མང་པོ་སྒྲོལ་བྱེད་ཀྱང་། །བདག་ཉིད་ཆུ་ཡི་དབུས་སུ་འཆི། །མ་བསྒོམས་ཆོས་ཀྱང་དེ་བཞིན་ནོ། །དཔེར་ན་དམུས་ལོང་རི་མོ་མཁན། །ཚོགས་དྲུག་དབུས་སུ་བྲི་བྱེད་ཀྱང་༑ ༑རང་གིས་གཅིག་ཀྱང་མི་མཐོང་ལྟར། །མ་བསྒོམས་ཆོས་ཀྱང་དེ་བཞིན་ནོ། །དཔེར་ན་འོན་པ་སིལ་སྙན་མཁན། ཚོགས་དྲུག་དབུས་སུ་བརྡུང་བྱེད་ཀྱང་། །རང་གིས་གཅིག་ཀྱང་མི་ཐོས་བཞིན། །མ་
1-2-134b
བསྒོམས་ཆོས་ཀྱང་དེ་བཞིན་ནོ། །འོ་ན་གང་བསྒོ་སྙམ་ན། བསྒོམ་པ་ནི་ཞི་གནས་དང་ལྷག་མཐོང་ཟུང་དུ་འབྲེལ་དགོས་ཏེ། ཞི་གནས་རབ་དུ་བརྟན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱ་སྟེ། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་གསུངས་སོ། །དེ་ཡང་། དང་པོར་སེམས་མི་གནས་པ་གནས་པར་བྱེད་པ་གལ་ཆེ། བར་དུ་གནས་པ་བརྟན་པ་བུ་མར་བརྟན་པ་བོགས་འབྱིན་པའི་གདམས་ངག་གལ་ཆེ། སེམས་གནས་པ་ཁྱད་པར་ཅན་ཡོད་ཙམ་ན། ཞི་གནས་ཀྱི་རྒྱ་མཚོ་དང་བ་ལ་ལྷག་མཐོང་ཟླ་བའི་གཟུགས་བརྙན་འཆར་བ་ཡིན་པས༑ དེ་ཡང་ལྷག་མཐོང་བསྐྱེད་པར་བྱེད་པའི་གདམས་ངག་ནི། སེམས་ཀྱི་གསང་འདི་མ་ཤེས་ན། ཞེས་པ་དང་། འདི་ལ་བསལ་བ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཅེས་དང་། རྣམ་ཤེས་རྟོག་པས་མ་སྒྲིབས་པ། །སྟོང་པ་ཉིད་ཀྱི་མཚན་ཉིད་དོ། །ཞེས་དང་། ནམ་མཁའ་ལྟ་བུའི་སེམས་འདི་ཡིས། །ནམ་མཁའ་ལྟ་བུའི་ཆོས་རྣམས་ལ། །ནམ་མཁའ་ལྟ་བུར་བསྒོམས་བྱས་ན། །ནམ་མཁའ་ལྟ་བུར་སངས་ཡང་རྒྱ། །ཞེས་པ་དང་། སེམས་རྟོགས་ན་སངས་རྒྱས་ཡིན་པས། སངས་རྒྱས་གཞན་ནས་མི་བཙལ་བར་བྱའོ། །ཞེས་པས་
1-2-135a
༄༅། །མཐོང་བསྐྱེད་པར་བྱའོ། །ལྷག་མཐོང་སྐྱེས་པའི་དུས་ན། རྡོ་རྗེ་གཅོད་པ་ལས། གང་གིས་ང་ལ་གཟུགས་སུ་མཐོང་། །གང་གིས་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སྐྱེ་བོ་དེ་ཡིས་ང་མི་མཐོང་། །འདྲེན་པ་རྣམས་ནི་ཆོས་ཀྱི་སྐུ། །ཆོས་ཉིད་ཤེས་པར་བྱ་མིན་ཏེ། །དེ་ནི་རྣམ་པར་ཤེས་མི་ནུས། །ཞེས་པ་དང་། ཕ་རོལ་ཏུ་ཕྱིན་པ་ལས་ཀྱང་། གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ལ། །འདུ་ཤེས་མཐོང་བ་མེད་ཅིང་སེམས་པ་མི་མཐོང་པ། །གང་ལ་རྣམ་པར་ཤེས་དང་སེམས་ཡིད་མཐོང་མེད་པ། །དེ་ནི་ཆོས་མཐོང་ཡིན་ཞེས་དེ་བཞིན་གཤེགས་པས་བསྟན། །ཞེས་པ་དང་། ཇོ་བོས་ཀྱང་༑ དེ་ལ་མཐོང་བྱ་མཐོང་བྱེད་མེད། །ཅེས་པས་མངོན་ནོ། །དེ་ཡང་འཆི་བ་མ་དྲན་ན་ཆོས་མི་འོང་པས་འཆི་བ་བསྒོམ་པ་རང་གནད་དུ་ཟབ་སྟེ། མལ་གྱི་ཐ་མར་ཉལ། ཟས་ཀྱི་ཐ་མ་ཟ། ཧ་ཟེར་ཙམ་ན་མི་འགྱོད་པ་གལ་ཆེ་གསུང་ངོ་། །དམ་པའི་གདམས་ངག་རིན་པོ་ཆེ། །སྐལ་ལྡན་རྣམས་ཀྱི་ནད་གསོ་བ། །བདུད་རྩི་འཆི་མེད་བཅུད་ཀྱི་ལེན། །དད་ཤེས་ལྡན་པས་ཉམས་ལེན་ཤོག །ཨྠྀི།། །།
༄། །བླ་ན་མེད་པའི་སངས་རྒྱས་ཚེ་གཅིག་ལུས་གཅིག་གིས་ཐོབ་པར་འདོད་པ་ལ་ཆོས་དྲུག་དང་ལྡན་པ་ཞིག་དགོས།
བླ་མ་རིན་པོ་ཆེ་ལ་ཕྱག་འཚལ་ལོ། །སློབ་དཔོན་རིན་པོ་ཆེའི་ཞལ་ནས། བླ་ན་མེད་པའི་སངས་རྒྱས་ཚེ་གཅིག་ལུས་གཅིག་གིས་ཐོབ་པར་འདོད་པ་ལ་ཆོས་དྲུག་དང་ལྡན་པ་ཞིག་དགོས་གསུང་། །དད་དང་ཤེས་རབ་སྙིང་རྗེ་དང་། 
1-2-135b
བླ་མ་མཇལ་དང་ཆོས་ཞུས་པ། །དེ་དོན་བསྒྲུབ་ལ་འབད་པའོ། །དེ་ལས་དང་པོར་དད་པ་གལ་ཆེ་སྟེ། དད་པ་མེད་པའི་མི་རྣམས་ལ། །དཀར་པོའི་ཆོས་རྣམས་མི་འབྱུང་སྟེ། །ས་བོན་མེ་ཡིས་ཚིག་པ་ལ། །མྱུ་གུ་སྔོན་པོ་མི་འབྱུང་བཞིན། །ཞེས་པ་ལ་སོགས་པ་དད་པ་མེད་པའི་ཉེས་དམིགས་མང་པོ་བཤད། །དད་པའི་ཕན་ཡོན་བསླབ་པ་ཀུན་ལས་བཏུས་ནས། དད་པའི་རྩ་བ་བརྟན་བྱས་ནས། །བྱང་ཆུབ་ལ་ནི་བློ་བརྟན་བྱ༑ ༑ཞེས་པས། ཡོན་ཏན་གྱི་ཆོས་ཐམས་ཅད་ཀྱི་ཡང་རྩ་བར་བཤད། རང་བྱུང་རྣམས་ཀྱི་དོན་དམ་དེ། །དད་པ་ཉིད་ཀྱིས་རྟོགས་བྱ་ཡིན། །ཉི་མའི་དཀྱིལ་འཁོར་འོད་འབར་བ། །མིག་མེད་པ་ཡིས་མཐོང་བ་མེད༑ ༑ཅེས་གསུངས་པས། དོན་དམ་པའི་གནས་ལུགས་སྐྱེ་བ་མེད་པའི་དོན་ཡང་དད་པ་ཁྱད་པར་ཅན་དང་ལྡན་པ་ཁོ་ནས་རྟོགས་པ་ཡིན་གསུང་། དེས་ན་མདོ་སྡེ་སྡོང་པོ་བཀོད་པ་ནས་ཀྱང་། དད་པ་གཏེར་དང་ནོར་དང་རྐང་པ་མཆོག །ལག་པ་བཞིན་དུ་དགེ་སྡུད་རྩ་བ་ཡིན། །ཡོན་ཏན་ཐམས་ཅད་བསྲུང་ཞིང་འཕེལ་བར་བྱེད། དད་པ་སྔོན་འགྲོ་མ་ལྟར་བསྐྱེད་པ་སྟེ། །དད་པས་བྱང་ཆུབ་ཤིང་ནི་རྣམ་པར་འཕེལ། །ཞེས་པ་ལ་སོགས་པ་ཕ་གི་ན་མར་མང་པོ་ཡང་དག་པ་བཤད། མཚན་ཉིད་པ་རྣམས་ཀྱིས། ཤེས་བྱ་བདེན་པ་བཞི་ལ་དད་པ་དང་། འབྲས་བུ་སྐུ་གསུམ་ལ་དད་པ་དང་། ལས་རྒྱུ་དང་འབྲས་བུས་ལ་དད་པ་དང་། 
1-2-136a
༄༅། །རྟེན་དཀོན་མཆོག་གསུམ་ལ་དད་པ་ལ་སོགས་པ་དད་པ་རང་ལ་མི་འདྲ་བ་མང་པོ་བཤད་ཀྱང་། འདོད་པའི་དད་པ་དང་། དང་བའི་དད་པ་དང་། ཡིད་ཆེས་པའི་དད་པ་དང་གསུམ་དུ་མ་འདུས་པ་ནི་མེད་གསུང་། དེས་ན་དད་པ་དང་ལྡན་པ་ཞིག་ཤིན་ཏུ་གལ་ཆེ། འོན་ཀྱང་དད་པ་ཡོད་ཀྱང་ཤེས་རབ་མེད་ན་ཅུང་མི་ཡོང་བས། ཤེས་རབ་དེ་ཤིན་ཏུ་གལ་ཆེ། མཚན་ཉིད་པས། དབང་པོ་བརྟུལ་པོ་དད་པའི་རྗེས་སུ་འབྲང་བ་ཟེར། །ཤེས་རབ་མེད་ན་ཆོས་བཤད་འདོད་ཀྱང་མེད། །བྱེད་རྒྱུ་ཕྱིན་ཅི་མ་ལོག་པ་ཞིག་འདི་ཡིན་སྙམ་པའང་དཀའ་བར་སྣང་གསུང་། ལོག་པའི་དགེ་བའི་བཤེས་གཉེན་གྱིས་མགོ་བསྐོར་བ་ལའང་ཚེགས་མེད་གསུང་། དེས་ན་སློབ་དཔོན་བློ་གྲོས་མི་ཟད་པས། ཡན་ལག་འདི་དག་ཐམས་ཅད་ནི། །ཐུབ་པས་ཤེས་རབ་དོན་དུ་གསུངས། །ཞེས་གསུངས་ནས་བསམ་གཏན་དང་བརྩོན་འགྲུས་ཐམས་ཅད་ནི་ཤེས་རབ་བསྐྱེད་པའི་རྒྱུར་བཤད། དེ་ཡི་ཕྱིར་ན་སྡུག་བསྔལ་དག །ཞི་བར་འདོད་པས་ཤེས་རབ་བསྐྱེད། །གསུངས་ནས་འཁོར་བའི་སྡུག་བསྔལ་ཞི་བར་འདོད་པ་ལ་ཡང་ཤེས་རབ་གལ་ཆེ་བར་གསུངས་ཕ་རོལ་ཏུ་ཕྱིན་པ་ནས་ཀྱང་། ཤེས་རབ་ཕ་རོལ་ཕྱིན་ལྔ་འདི་དག་ནི། །དམིགས་སུ་མེད་པར་བྱང་ཆུབ་རེག་པར་ནུས་མ་ཡིན། །གང་ཚེ་ཤེས་རབ་ཀྱིས་ནི་ཡོངས་སུ་ཟིན་གྱུར་པ། །གང་ཚེ་མིག་གི་
1-2-136b
རྙེད་འགྱུར་ཞིང་དེ་ཡི་མིང་འཐོབ་བོ། །ཞེས་གསུངས་པས། ཤེས་རབ་ཀྱིས་མ་ཟིན་པའི་དགེ་བ་ཅི་བྱས་པ་ཐམས་ཅད་དམུས་ལོང་ལོང་ཁྲིད་དང་བྲལ་བ་འདྲ་སྟེ། བྱང་ཆུབ་ཀྱི་རྒྱུར་མི་འགྲོ་ཕ་རོལ་ཕྱིན་པ་རང་གི་མིང་ཡང་མི་འཐོབ་པར་བཤད་དོ། །ཤེས་རབ་སྟོང་པས་ཟིན་ན་ཅི་བྱས་པ་ཐམས་ཅད་བྱང་ཆུབ་ཀྱི་ལམ་དུ་འགྲོ། ཁྱི་རྒན་ལ་ཟས་ཁམ་གཅིག་བྱིན་ཡང་སྦྱིན་པའི་ཕ་རོལ་ཏུ་ཕྱིན་པར་གཟོད་བཤད་གསུང་། དེས་ན་ཤེས་རབ་དེ་ཤིན་ཏུ་གལ་ཆེ་སྟེ། ཅི་ཐོད་ཐོད་ཤེས་པའི་ཤེས་རབ་དེས་ཅུང་མི་འོང་། ཐོས་པའི་ཤེས་རབ་ཀྱིས་ཉོན་མོངས་པ་ངོ་ཤེས་པ་ཞིག་དགོས། བསམ་པའི་ཤེས་རབ་ཀྱིས་ཉོན་མོངས་པ་མགོ་ནོན་པ། བསྒོམ་པའི་ཤེས་རབ་ཀྱིས་ཉོན་མོངས་པ་རྩ་བ་ནས་སྤོངས་པ་ཞིག་དགོས། དེ་ཡང་ཤེས་རབ་ཆེན་པོ་དེ་ཡོད་ཀྱང་། སྙིང་རྗེ་མེད་ན་མི་ཕན་པས། སྙིང་རྗེ་གལ་ཆེ་སྟེ། དམ་པའི་ཆོས་པད་མ་དཀར་པོ་ནས་ཀྱང་། ཆོས་གཅིག་མཆིས་ན་ཆོས་ཐམས་ཅད་དེའི་ལག་མཐིལ་ན་མཆིས་པའི་ཆོས་གཅིག་ཡོད་དེ། དེ་གང་ལགས་ཞུས་པས། འདི་ལྟ་སྟེ། སྙིང་རྗེ་ཆེན་པོའོ། །ཞེས་གསུང་། གང་ལ་མགོ་བོ་མཆིས་པ་དེ་ལ་འཚོ་བ་མཆིས་སོ། །དེ་བཞིན་དུ་སྙིང་རྗེ་མཆིས་པ་དེ་ལ་བླ་ན་མེད་པའི་བྱང་ཆུབ་མཆིས་སོ། །མདོ་ཏིང་ངེ་འཛིན་རྒྱལ་པོ་ནས་ཀྱང་། ཆོས་གཅིག་གིས་བླ་ན་མེད་པའི་བྱང་ཆུབ་འཐོབ་བམ་ཞུས་པས། ཆོས་གཅིག་ཡོད་
1-2-137a
༄༅། །ན་བླ་ན་མེད་པའི་སངས་རྒྱས་ཡོད་དེ། འདི་ལྟ་སྟེ། སྙིང་རྗེ་ཆེན་པོའི་ཞེས་གསུང་། དེས་ན་སྙིང་རྗེ་ཆེན་པོ་དང་ཤེས་རབ་འབྲེལ་བ་ཞིག་དགོས་ཏེ། ཕ་རོལ་ཏུ་ཕྱིན་པའི་ཐེག་པ་ནས། ཐབས་ཤེས་རབ་གཉིས་འབྲེལ་དགོས་པར་བཤད། ག་ཡ་གོ་རིའི་མདོ་ནས་ཤེས་རབ་དང་བྲལ་བའི་ཐབས་ཀྱང་འཆིང་བ། ཐབས་དང་བྲལ་བའི་ཤེས་རབ་ཀྱང་འཆིང་བ། ཞེས་གསུངས་པས། ཐབས་ཤེས་རབ་འབྲེལ་བ་གལ་ཆེ་བར་གསུངས། གསང་སྔགས་ནས། བསྐྱེད་རྫོགས་གཉིས་ཡ་མ་བྲལ་བར་བཤད་པའི་དགོངས་པ་ཡང་། འདི་གཉིས་མ་ཚང་ན་བླ་ན་མེད་པའི་བྱང་ཆུབ་མི་འཐོབ་སྟེ། བྱ་འདབ་ལོགས་ཆད་པ་དང་འདྲ་གསུང་༑ ཡོན་ཏན་དེ་གསུམ་ཚང་ཡང་། ལམ་སྣ་འདྲེན་པའི་བླ་མ་གཅིག་དང་མ་མཇལ་ན་མི་ཕན་པས། ཏན་ཐམས་ཅད་རབ་རྫོགས་ཀྱང་། །བླ་མ་མེད་ན་སྲིད་ཐར་མིན། །རྐྱ་བ་འཛིན་པ་མེད་པར་ནི། །གྲུ་ཡིས་ཕྲོལ་འགྲོ་མི་ནུས། །ཞེས་གསུངས་པས་བླ་མ་དམ་པ་གཅིག་དང་མཇལ་བ་གལ་ཆེ། དམ་པ་རྣམས་ནི་སུས་ཀྱང་མི་སྤང་སྟེ། །དུལ་བའི་ཚུལ་གྱིས་དགེ་བཤེས་བསྟེན་པར་བྱ། །དེ་དང་ཉེ་ན་དེའི་ཡོན་ཏན་རྣམས། །ཆེད་དུ་མ་བསྒོས་པས་ཀྱང་དགོས་པར་འགྱུར། །ཞེས་གསུངས་པས། བླ་མ་དམ་པ་བསྟེན་དགོས་པར་བཤད་གསུང་། བླ་མའི་མཚན་ཉིད་ཀྱང་། །བཤེས་གཉེན་དུལ་བ་ཞི་ཞིང་ཉེར་ཞི་བ། །ཡོན་
1-2-137b
ཏན་ལྷག་པར་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་ལ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བསྟེན། །བྱ་བ་གསུངས། བདེན་མཐོང་སྨྲ་མཁས་བརྩེ་བ་ཅན། །སྐྱོ་མེད་སྐྱེས་བུ་དམ་པ་ནི། །ཆེན་པོ་ཡིན་པར་ཤེས་པར་བྱ། །ཞེས་མདོ་སྡེ་རྒྱན་ལས་བཤད། སློབ་དཔོན་བློ་གྲོས་མི་ཟད་པའི་ཞལ་ནས། རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའ་བརྟུལ་ཞུགས་མཆོག །སྲོག་གི་ཕྱིར་ཡང་མི་བཏང་ངོ་། །ཞེས་གསུངས། གསང་སྔགས་དང་མཚན་ཉིད་ཀྱི་གཞུང་རེ་རེ་ནས་བླ་མའི་མཚན་ཉིད་མ་གསུངས་པ་མེད་ཀྱང་། བླ་མ་དྭགས་པོ་རིན་པོ་ཆེའི་ཞལ་ནས། ཚེ་འདི་ལ་ལྟོས་ཐག་བཅད་པ། ཤེས་རབ་ཆེན་པོའི་སྒོ་ནས་གཞན་གྱི་ལམ་སྣ་འདྲེན་པ། སྙིང་རྗེ་ཆེན་པོའི་སྒོ་ནས་སློབ་མ་ཡལ་བར་མི་འདོར་བ་ཞིག་དགོས་པ་ཡིན་གསུང་ངོ་། །དང་པོ་བླ་མ་དེ་ཚེ་འདི་ལ་ལྟོས་པ་ཡོད་ན། སློབ་མ་ལ་ཡང་བསྙེན་བཀུར་ལ་སོགས་པ་ཡོད་ན་ཐུགས་ལ་དོགས། མེད་ན་ནི་གདམས་ངག་མི་སྟོན། ཁོ་རང་ཚེ་འདི་ལ་མཆུར་ཅི་རིང་དང་ཞེང་དུ་ཅི་ཆེ་བྱེད། ཆགས་སྡང་ལ་སོགས་པའི་སྡིག་པ་མང་པོ་ཡང་དག་འཕེལ། སློབ་མ་སློབ་དཔོན་ལ་བརྟེན་ནས་སྡིག་པ་མང་པོ་ཡང་དག་འཕེལ། མ་ལེགས་ན་མཛོ་སྦྲེལ་གཡང་ལ་ལྟུང་བ་ལྟ་བུ་ལ་ཚེགས་མེད་པས། དེས་ན་སློབ་དཔོན་དེ་ཚེ་འདི་ལ་
1-2-138a
༄༅། །ལྟོས་ཐག་བཅད་པ་གཅིག་དགོས་སོ། །འོན་ཀྱང་ཤེས་རབ་མེད་ན་སློབ་མའི་སེམས་རྒྱུད་དང་བསྟུན་པའི་ཆོས་བཤད་མི་ཤེས་པས། སེམས་ཅན་མོས་པ་མང་པོ་ཐ་དད་པའི་དོན་བྱེད་པ་ལ་ཁོ་རང་གི་བློ་དང་འཐུན་པའི་གདམས་ངག་རིམ་པ་བཞིན་བསྟན་དགོས་པ་ཡིན་ཏེ། རིགས་པའི་གནས་ལྔ་དག་ལ་མཁས་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་མི་ཐོབ། །ཞེས་བྱ་བ་ཡང་གསུངས༑ ཇོ་བོའི་ཞལ་ནས་ཀྱང་། འོ་སྐོལ་ཚེ་ཐུང་། ཡུད་ཙམ་འདི་ལ་སྒྲ་ཚད་ལ་སོགས་པ་ཕྱི་རིག་པ་དང་བསྟན་བཅོས་མང་པོ་ཉན་མི་ཁོམ། སློབ་མི་ཁོམ། ནང་རིག་པའི་བསྟན་བཅོས་མང་པོ་ནི་གལ་ཆེ་གསུང་༑ བླ་མ་དེ་ལ་ཆོས་ཅི་ཞུས་ཀྱང་ངས་མི་ཤེས་ཟེར་བས་ཀྱང་མི་འོང་བ་ཡིན་ཏེ། དེས་ན་ཤེས་རབ་ཆེན་པོའི་སྒོ་ནས་གཞན་གྱི་ལམ་སྣ་འདྲེན་ནུས་པ་ཞིག་དགོས་པ་ཡིན་ནོ། །འོན་ཀྱང་སྙིང་རྗེ་མེད་ན་རང་ལ་སྡུག་བསྔལ་བག་ཙམ་བྱུང་བའི་དུས་སུ་ཡང་འཁོར་མི་སྐྱོང་སྙམ་པའི་སྐྱོ་བ་མང་པོ་ཡང་འབྱུང་། སེམས་ཅན་དམུ་རྒོད་མང་པོའི་དོན་བྱེད་དགོས་ཙམ་ན། ཕར་ལ་ཆོས་ཀྱིས་བསྐྱངས་ཙམ་ན། ཚུར་ལ་ཚིག་མ་ལེགས་པོ་མང་པོ་འོང་ཡང་སྲིད་པས། དེ་དུས་སུ་རྙིང་རྗེ་མེད་ན་ཁོའི་དོན་དུ་ཆོས་དང་དཀའ་སླ་མང་པོ་བྱས་ཀྱང་ངན་པ་འདི་ཉན་པར་མི་འདུག་སྙམ་ནས་ཡལ་བར་འདོར་བའི་བློ་སྐྱེ་ཡང་སྲིད་པས། སྙིང་རྗེ་ཆུང་
1-2-138b
ན་སློབ་མ་ལ་སྡུག་བསྔལ་བྱུང་བའི་དུས་སུ་ཅུང་ཞིག་མི་སྐྱོང་ཡང་སྲིད་པ་ཡིན་པས། རང་ལ་བློ་གཏད་པའི་སློབ་མ་ལ་སྲོག་ལ་ཐུག་ཀྱང་འདི་ངན་སོང་དུ་མ་སོང་ན་རུང་སྙམ་པའི་སྙིང་རྗེ་ཆེན་པོ་གཅིག་དགོས། དེ་ལྟ་བུའི་བླ་མ་དམ་པ་ལ་བསྟེན་ཀྱང་། གདམས་ངག་རིན་པོ་ཆེ་མ་ཞུས་ན། ཁྱི་དང་རྟ་ལ་སོགས་པའི་དུད་འགྲོས། བླ་མ་དང་འགྲོགས་ཀྱང་མི་ཕན། ཞབས་རྟོག་ལོ་བྱེ་བ་ཙམ་བྱས་ཀྱང་མི་ཕན་པས། གདམས་ངག་རིན་པོ་ཆེ་མགོ་རྩ་མ་ལོག་པ་ཞག་ཞུ་དགོས། དེ་ཡང་ཚོང་དུས་ཀྱི་འོ་མར་མ་སོང་བ། ཚིག་དང་ཐ་སྙད་མང་པོ་དང་མ་བསྲེས་པ་ཞིག་དགོས་ཏེ། དེ་ཡང་སྙན་ཁུངས་ནས་སྙན་ཁུངས་སུ་བརྒྱུད་པ། བྱིན་རླབས་ཀྱི་བཀའ་མ་ཉམས་པ་ཞིག་དགོས་གསུང་། འོན་ཀྱང་བསྒྲུབ་པ་ཚུལ་བཞིན་དུ་མ་བྱས་ན་གདམས་ངག་དེ་བེ་བུམ་གྱི་ནང་ན་ཡོད་པ་ལྟ་བུས་ཕན་པ་མ་ལགས་ཏེ། སྨན་དཔྱད་བཀླགས་པ་ཙམ་གྱིས་ཀྱང་༑ ༑ནད་པ་དག་ལ་ཕན་འགྱུར་རམ། །གསུང་བས། སྨན་དཔྱད་བཀླགས་པས་མི་ཕན་ཏེ། སྨན་སྦྱར་ནས་ཟ་དགོས་པ་དང་འདྲ་བར། གདམས་ངག་ཡོད་པས་མི་ཆོག་ཉམས་སུ་ལེན་དགོས། བཅོམ་ལྡན་འདས་ཀྱིས་ཀྱང་། སྡུག་བསྔལ་ཟུག་རྔུ་གཅོད་མཛད་པའི། །ལམ་ནི་ཁྱོད་ལ་ངས་བཤད་ཀྱིས། །དེ་བཞིན་གཤེགས་པ་སྟོན་བྱེད་ཡིན། ཁྱེད་ཉིད་ཀྱིས་ནི་བསྒྲུབ་པར་གྱིས། །ཞེས་གསུངས་པ་ཡིན། གདམས་
1-2-139a
༄༅། །ངག་ལ་སོགས་པ་མང་པོ་བཤད་པ་ཐམས་ཅད་ཀྱིས་ཀྱང་འོན་པའི་རོལ་མོ་དང་ཁྱད་མེད་པ་ཡིན་གསུང་། ཟས་ནོར་དཔག་ཏུ་མེད་པའི་ནང་དུ་ལྟོགས་གྲིར་ཤི་བ་དང་ཁྱད་མེད་འདྲ་སྟེ། དེ་ཡང་ཟ་མ་ནུས་པས་ལན་པ་ཡིན་གསུང་། གདམས་ངག་ཀྱང་ཡོད་པས་མི་ཆོག་སྟེ། ཉམས་སུ་ལེན་པ་དེ་ཤིན་ཏུ་གལ་ཆེ། འབ་ཧྲིལ་གྱིས་དྲིལ་ནས། རང་མལ་གྱི་ཐ་མ་ན་ཉལ། ཟས་ཀྱི་ཐ་མ་ཆུ་ཐོགས་གཅིག་འཐུང་། ཉེ་དུ་རྣམས་ཀྱིས་མཐའ་བསྐོར། དབུགས་རིང་ཐུང་རིང་ཐུང་བྱེད་པའི་དུས་སུ། རང་རེ་སྣང་བ་ནས་སྣང་བར་འགྲོ་བ། བདེ་བ་ནས་བདེ་བར་འགྲོ་བ། ཡི་དམ་མཁའ་འགྲོའི་སུན་མ་འོང་བ་ཞིག་དགོས་པ་ཡིན། ད་ལྟ་ནས་སོ་སོ་རང་རེའི་ཕུར་མགོའི་ཁ་བ་འཕྱག་པ་གལ་ཆེ་གསུང་། དེ་ལྟར་ཐུགས་ལ་བཞག་པར་ཞུ།བདེ་བར་གཤེགས་པས་ལེགས་པར་གསུངས་པ་བདུད་རྩིའི་རྒྱུན། །དེ་ཡང་སྐལ་ལྡན་ཉོན་མོངས་གདུང་སེལ་བདེ་བའི་འབྱུང་གནས་གཏེར། །སེམས་ལ་རབ་བཏབ་བྱང་ཆུབ་མྱུ་གུ་འབྱུང་བའི་མཆོག །འགྲོ་བ་རྣམས་ཀྱིས་ཉམས་སུ་བླངས་པས་སྡུག་བསྔལ། །གནས་ལས་ངེས་པར་འབྱུང་གྱུར་ཅིག །བླ་མ་རིན་པོ་ཆེའི་གསུང་། ཨྠྀི།། །།

